ទំលាប់សំុគ្រូធ្នប់អោយជួយនិងស៊ីសាច់គ្រូធ្មប់នៅប៉ាពួហ្គីណេ

នៅប្រទេសដែនកោះដ៏ធំ (៤៦១.៦៩១គីឡូម៉ែត្រការ៉េ) ប៉ាពួញូវហ្គីណេ ប្រជាជននៅតែមានជំនឿថា ក្នុងប្រទេសរបស់ខ្លួនមានគ្រូធ្មប់ប្រកបដោយវេទមន្តខ្លាំងពូកែ អាចប្រើវេទមន្តសម្លាប់មនុស្សបាន ហេតុនេះ ម្នាក់ៗត្រូវមានភារកិច្ចតាមចាប់គ្រូធ្មប់នេះដើម្បីស៊ីសាច់វិញ ។ សាច់គ្រូធ្មប់ គេហៅថា «សាច់ជ្រូកវែង» ។ ស៊ីសាច់ជ្រូកវែង គឺជាប្រពៃណីយូរអង្វែងមួយនៅប៉ាពួញូវហ្គីណេ ។

សង្ឃឹមលើថាមពលអច្ឆរិយ
ក្រោយ ពេលស៊ើបអង្កេតរួម ប៉ូលិសប៉ាពួ ញូវហ្គីណេបានឱ្យដឹងថា មនុស្សដែលចូលចិត្តស៊ីសាច់គ្រូធ្មប់មានតែប្រហែល៧០០ ដល់១.០០០នាក់បុ៉ណ្ណោះ ភាគច្រើននៅតាមភូមិក្រីក្រ ។ ពួកគេមានជំនឿថា បើបានស៊ីគ្រឿងក្នុងគ្រូធ្មប់ «នឹងមានថាមពលអច្ឆរិយ» ក្លាយជាមនុស្សដែលគ្រាប់កាំភ្លើងបាញ់មិនមុត ជាមនុស្សមានសុខភាពល្អរហូត ជាមនុស្សមានសំណាងល្អរហូត អត់ចេះជួបគ្រោះថ្នាក់អ្វីបណ្តាលឱ្យស្លាប់ឡើយ ។

ប៉ូលិស ចាប់បានមនុស្ស២៩នាក់ក្នុងក្រុម «តាមចាប់គ្រូធ្មប់» មួយ ។ ពួកជនត្រូវចាប់ខ្លួនទាំងនោះធ្លាប់សម្លាប់ស៊ីសាច់បុរស៧នាក់ដែលគេ ចោទថា ចេះធ្មប់ ។ ពួកគេស៊ីខួរជាបឋម បន្ទាប់មកស៊ីគ្រឿងក្នុង និងលិង្គគ្រូធ្មប់នោះ ។ ជនត្រូវចាប់ខ្លួនម្នាក់ឆ្លើយប្រាប់ប៉ូលិសថា ជាដំបូងពួកគេនាំគ្នាស៊ីខួរគ្រូធ្មប់សិន រួចហើយវះពោះបារយកគ្រឿងក្នុង និងកាត់លិង្គជៀរយកទៅផ្ទះឱ្យអ្នកផ្ទះស្លធ្វើម្ហូបទទួលទាន ទាំងអស់គ្នា ។

ពួកជនត្រូវចាប់ខ្លួនទាំង២៩នាក់ ក្នុងនោះមានស្រី២នាក់ត្រូវចោទប្រកាន់ពីបទសម្លាប់មនុស្សដោយ ចេតនា ។ ពួកគេតវ៉ាថា ធ្វើបែបនេះ គឺត្រឹមត្រូវព្រោះពួកគ្រូធ្មប់ពេលព្យាបាលជំងឺ ម្តងៗ ទារថ្លៃខ្ពស់ណាស់ ទោះគ្រួសារអ្នកជំងឺក្រីក្រសឹងដាច់ពោះស្លាប់ ក៏មិនលើកលែងដែរ មិនតែប៉ុណ្ណោះគ្រូធ្មប់ខ្លះទាមទារដេកជាមួយស្រីក្មេងក្នុងភូមិ ទៀត បើមិនរកស្រីក្មេងឱ្យដេកជាមួយទេ អត់ខ្ចីព្យាបាលជំងឺឱ្យទេ ។

ដើម្បី អញ្ជើញគ្រូធ្មប់មកធ្វើពិធីបណ្តេញខ្មោចចេញពីខ្លួនអ្នកជំងឺ គ្រូធ្មប់ទារប្រាក់១.០០០ Kina (ប្រហាក់ប្រហែល៤៧៥ដុល្លារអាមេរិក) រួមជាមួយជ្រូក១ក្បាល និងអង្ករ១បាវ ។ មិនតែប៉ុណ្ណោះ គ្រូធ្មប់ខ្លះថែមទាំងទាមទារដេកជាមួយស្រីក្មេង ឬប្រពន្ធអ្នកណាដែលនៅស្អាតទៀត ។ ព្រោះតែដូច្នេះ ទើបក្រោយមកប្តីរបស់ស្ត្រីដែលត្រូវគ្រូធ្មប់ដេកជាមួយ បបួលគ្នីគ្នាតាមចាប់គ្រូធ្មប់នោះសម្លាប់ស៊ីសាច់វិញ ។

ធ្វើទារុណកម្មដូចសត្វនរក
កាលពី ឆ្នាំ២០១៣ មានព័ត៌មានស្តីពីបុរសម្នាក់ត្រូវគ្រូធ្មប់បង្ខំឱ្យស៊ីសាច់ កូនបង្កើតរបស់ខ្លួនទើបកើតបានប៉ុន្មានម៉ោង បើមិនធ្វើអីុចឹង ជំងឺពុំអាចជាបានទេ ។ កាលពីឆ្នាំ២០០៩ គ្រូធ្មប់ស្រីម្នាក់ត្រូវសម្រាតខោអាវកណ្តាលវាល ហើយដុតសម្លាប់ចោលទាំងរស់ ។ ឆ្នាំ២០១៣ អ្នកគ្រូម្នាក់ត្រូវពួកអ្នកភូមិចាប់ធ្វើទារុណកម្មយ៉ាង សាហាវយង់ឃ្នង ដូចទារុណកម្មលើសត្វនរក រួចហើយកាត់ក្បាលចោល ដោយចោទគាត់ថា ធ្វើធ្មប់សម្លាប់អ្នកភូមិម្នាក់ ។ អ្នកគ្រូនោះឈ្មោះ Helen Rumbali ត្រូវអ្នកភូមិខ្លះកាន់កាំភ្លើង ខ្លះកាន់កាំបិត ពូថៅ ចាប់អូសដៃចេញពីក្នុងផ្ទះជាមួយបងស្រីរបស់ខ្លួន និងក្មួយស្រី តូចៗ២នាក់ទៀត បន្ទាប់មកដុតផ្ទះគាត់ចោល ។ ពួកជនឃោរឃៅចោទប្រកាន់អ្នកគ្រូ Helen Rumbali អាយុ៤០ឆ្នាំរូបនេះថា បានធ្វើធ្មប់សម្លាប់អ្នកភូមិម្នាក់ ។ ពួកគេស្គាល់ច្បាស់ជនដៃដល់ជាអ្នកណា ដោយសាររុយមួយហ្វូងហើរពីផ្នូរជនរងគ្រោះមកដល់ផ្ទះនេះ ហើយផ្នូរជនរងគ្រោះមានស្លាកស្នាមវេទមន្តអាបធ្មប់ជាច្រើន ។ ប៉ូលិសពេលឮព័ត៌មាននេះប្រញាប់ប្រញាល់ធ្វើដំណើរទៅជួយ តែទម្រាំទៅដល់កន្លែងកើតហេតុហួសពេលទៅហើយ អ្នកគ្រូ Rumbali ត្រូវកាត់ក្បាលបន្ទាប់ពីរងទារុណកម្មយ៉ាងសាហាវដូចសត្វនរក ។ ចំណែកបងស្រីវិញ និងក្មួយស្រី តូចៗ២នាក់របស់គាត់ ត្រូវធ្វើទារុណកម្មឆូតសាច់ដោយចុងកាំបិតអស់រយៈពេល៣ថ្ងៃ ។ អ្នកស្រុកយល់ព្រមដោះលែងអ្នកទាំង៣រូបនេះវិញក្រោយមានអន្តរាគមន៍ ពីប៉ូលិស ។

មុននោះទៀត ស្ត្រី៦នាក់ត្រូវចាប់ធ្វើទារុណកម្មវាយដំដោយបន្ទះដែក ហើយស្ត្រីម្នាក់ត្រូវកាប់សម្លាប់ទាំងរស់ ។ កាលពីខែកុម្ភៈ ឆ្នាំ២០១៣ អ្នកម្តាយវ័យក្មេងម្នាក់ ត្រូវចោទថាចេះធ្មប់អាបដូចគ្នា ហើយត្រូវដុតទាំងរស់នៅចំពោះមុខអ្នកភូមិច្រើនកុះករ ។

លោភលន់ និងច្រណែនឈ្នានីស
នៅ ប្រទេសប៉ាពួញូវហ្គីណេមាន «ច្បាប់គ្រូធ្មប់» តាំងពី៤២ឆ្នាំមុនម្ល៉េះ ។ ច្បាប់នោះអនុញ្ញាតឱ្យសម្លាប់អ្នកណាដែលមហាជនជឿថា ចេះអាបធ្មប់ ហើយធ្លាប់ធ្វើធ្មប់សម្លាប់មនុស្ស។ អ្នកជាតិពន្ធុវិទ្យា Richard Eve ដកដង្ហើមធំរួចនិយាយថា «មិនសង្ឃឹមបញ្ចប់ទំនោរតាមចាប់គ្រូធ្មប់» បាន ឆាប់ៗទេ ព្រោះប៉ូលិសប៉ាពួញូវហ្គីណេមានចំនួនតិចពេក ហើយទន្ទឹមនឹងមានចំនួនតិចនោះ ប៉ូលិសខ្លះក៏ជឿថា អ្នកដែលគេចោទថា ចេះធ្មប់នោះពិតជាធ្លាប់ធ្វើឱ្យអ្នកឯទៀតស្លាប់មែន» ។

អ្នកឯកទេស ជាច្រើនយល់ថា អំពើហិង្សាពាក់ព័ន្ធទោស «ធ្វើធ្មប់» ដែលចេះតែកើនឡើងនេះ អាចថាមួយភាគពាក់ព័ន្ធអបិយជំនឿ តែមួយភាគទៀតពាក់ព័ន្ធការខុសគ្នារវាងខាងសេដ្ឋកិច្ច ធ្វើឱ្យកើតមានគំនិតច្រណែនឈ្នានីស ។ អ្នកខ្សត់ច្រណែនអ្នកធូរធារ តែធ្វើអីគេមិនបាន ក៏ចោទថា «ចេះធ្មប់» ដើម្បីសម្លាប់ចោល ។ សព្វថ្ងៃប្រជាជនប៉ាពួញូវហ្គីណេទាំង៧លាននាក់ភាគច្រើនបំផុត ច្រើនតែក្រីក្រខ្វះមុខខ្វះក្រោយ អ្នកក្រខ្លះឃើញគេគ្រាន់បើជាងខ្លួន ក៏កើតចិត្តច្រណែនឈ្នានីសចង់កម្ចាត់ចោល ដូចករណីអ្នកគ្រូ Rumbali ជាដើម ។ អ្នកគ្រូ Rumbali ធូរធារជាងមនុស្សជុំវិញខ្លួនគាត់ ប្តីនិងកូនគាត់ជាបុគ្គលិករដ្ឋ ខ្លួនគាត់ក៏ជាបុគ្គលិករដ្ឋ មានផ្ទះឈើធំស្អាតជាង អ្នកណាៗទាំងអស់នៅជុំវិញ ។ ភាពលេចធ្លោជាងគេនេះ ធ្វើឱ្យមានមនុស្សជាច្រើនច្រណែនដល់ថ្នាក់កើតគំនិតឈ្នានីស ។

គ្រូធ្មប់ប្រាប់មុខសញ្ញា
អង្គការ ហប្រជាជាតិព្រួយបារម្ភយ៉ាងខ្លាំងពីអបិយជំនឿជុំវិញ «អាបធ្មប់» នៅប៉ាពួ ញូវហ្គីណេ ដោយកត់សម្គាល់ឃើញថា ជំនឿបែបនេះរីកសាយច្រើនតាមតំបន់ដាច់ស្រយាល ខ្វះរបាយការណ៍ព័ត៌មាន ។ ប្រការដែលអង្គការសហប្រជាជាតិព្រួយបារម្ភមួយទៀត គឺពួកអ្នកលើកគ្នាតាមចាប់ «គ្រូធ្មប់» ហាក់ដូចកម្រទទួលការផ្តន្ទាទោសឱ្យសក្តិសមនឹងអំពើរបស់ខ្លួននៅឡើយ ។

លោក មេធាវី Miranda Forsyth នៅមហាវិទ្យាល័យរដ្ឋប្រទេសអូស្ត្រាលី បានឱ្យដឹងថា ជំនឿរបស់ប្រជាជនប៉ាពួញូវហ្គីណេ គឺបើមិនសម្លាប់អ្នកដែលគេជឿថា ចេះធ្វើធ្មប់ទេ អ្នកនោះនឹងបន្តសាបព្រោះមរណៈភាពអពមង្គល និងជំងឺតម្កាក់ចំពោះអ្នកភូមិអ្នកស្រុកតទៅទៀតមិនខាន ។ បណ្តាប្រទេសជិតខាងប៉ាពួ ញូវហ្គីណេ ដូចយ៉ាង Vanuatu និងប្រជុំកោះ Solomon ជាដើមក៏មានជំនឿលើអាបធ្មប់ដែរ តែមិនមានអំពើហិង្សាជ្រុលនិយមហួសហេតុដូចនៅប៉ាពួញូវហ្គីណេឡើយ ។

អ្នក ពន្ធុវិទ្យា Philip Gibbs ដែលជាបព្វជិតកាតូលិកមួយរូបធ្លាប់នៅប៉ាពួ ញូវហ្គីណេ ៤១ឆ្នាំមកហើយ បានឱ្យដឹងថា ចលនាតាមចាប់គ្រូធ្មប់ផ្ទុះខ្លាំងជាងគេនៅខេត្ត Climbu របស់ប៉ាពួ ញូវហ្គីណេ ។ ប្រជាជនប៉ាពួ ញូវហ្គីណេ សព្វថ្ងៃនិយមកប់សពក្នុងផ្នូរធ្វើពីបេតុងយ៉ាងរឹងមាំ ដើម្បីកុំឱ្យសពត្រូវសត្វព្រលឹងខ្មោចចូលស៊ីសាច់បាន ។ គេជឿថា សត្វព្រលឹងខ្មោចនោះច្រើនតែសណ្ឋិតនៅក្នុងខ្លួនមនុស្សណាម្នាក់ លុះយប់ឡើងដកព្រលឹងចេញពីខ្លួនអ្នកនោះទៅស៊ីសាច់សពក្នុងផ្នូរ ធ្វើឱ្យសពក្លាយជាបិសាចកំណាច បង្កគ្រោះថ្នាក់ពេញភូមិស្រុក ។ ដូច្នេះហើយគេក៏ទៅរកគ្រូធ្មប់ឱ្យជួយប្រើវេទមន្តប្រមើលមើល តើអ្នកណាកំពុងត្រូវសត្វព្រលឹងខ្មោចចង្រៃនោះសណ្ឋិតក្នុងខ្លួន ដើម្បីលើកគ្នាទៅចាប់ ។ ឃើញទេ ពេលត្រូវការព្យាបាលជំងឺ គេពឹងគ្រូធ្មប់ជួយព្យាបាល ពេលចង់ដឹងព្រលឹងសត្វខ្មោចកំណាចចង្រៃកំពុងលាក់ខ្លួនក្នុងរាងកាយ អ្នកណា ក៏ពឹងគ្រូធ្មប់ លុះមានអ្នកស្រុកឈឺស្លាប់ទាំងអាយុនៅក្មេងគេថាមកពីគ្រូធ្មប់ ប្រើវេទមន្តសម្លាប់ ក៏លើកគ្នាតាមចាប់សម្លាប់គ្រូធ្មប់វិញ វិលវល់ទៅមក ដដែលៗ។ អ្នកប្រកបរបរធ្មប់អាបខ្លះស្លាប់ខ្លួនដោយសារទាមទារដេកជាមួយ ប្រពន្ធកូនគេ ។ បើមិនបានដូចបំណង អត់ខ្ចីព្យាបាលឱ្យ ។

បព្វជិត Gibbs និយាយទៀតថា អ្នកណាត្រូវអ្នកស្រុកសង្ស័យកំពុងមានព្រលឹងសត្វខ្មោចកំណាចសណ្ឋិត ក្នុងខ្លួន តែងត្រូវចាប់វាយដំធ្វើទារុណកម្មបង្ខំឱ្យសារភាពថា មានព្រលឹងខ្មោចកំណាចកំពុងសម្ងំក្នុងរាងកាយខ្លួនមែន ការធ្វើទារុណកម្មនេះ ជួនកាលឈានដល់សម្លាប់ចោលតែម្តង ។ ហេតុនេះគ្រួសាររបស់អ្នកដែលគេចោទថា មានព្រលឹងសត្វខ្មោចសណ្ឋិតក្នុងខ្លួន តែងប្រញាប់ប្រញាល់រត់ចោលដីស្រែចម្ការ និងផ្ទះសម្បែង ។ ក្រោយពីម្ចាស់ដីរត់ទៅបាត់ អ្នកភូមិនាំគ្នាពិចារណាតើដីស្រែចម្ការ និងផ្ទះសម្បែងរបស់អ្នករត់ចោលនោះគួរឱ្យទៅអ្នកណា ។ ពេលនោះហើយដែលចិត្តលោភលន់ផ្ទុះឡើងនាំដល់ការសម្លាប់គ្នាដោយចោទ ថា «ចេះធ្មប់» ។ សរុបមក អ្នកត្រូវគេសម្លាប់មិនមែនសុទ្ធតែអ្នករៀនអាបធ្មប់មែនទែនទេ អ្នកស្លូតត្រង់គគោកក៏ត្រូវចោទថាចេះធ្មប់ ហើយសម្លាប់ចោលដែរ ដោយសារច្រណែនឈ្នានីសក៏មាន ដោយសារការលោភលន់ក៏មាន ។

សព្វថ្ងៃ មានសកម្មភាពមួយដើម្បីរួមចំណែកកាត់បន្ថយចលនា «តាមចាប់គ្រូធ្មប់» ។ ខេត្ត Chimbu ដែលសម្បូរករណីសម្លាប់ស៊ីសាច់គ្រូធ្មប់ជាងគេ ពួកវេជ្ជបណ្ឌិតក្នុងមន្ទីរពេទ្យ Kundiawa ព្យាយាមពន្យល់គ្រួសារដែលមានសាច់ញាតិឈឺស្លាប់ឱ្យយល់ពីមូលហេតុនៃ ជំងឺ ដើម្បីកាត់បន្ថយគ្រោះថ្នាក់សម្លាប់មនុស្សសងសឹកក្រោមលេស «សម្លាប់គ្រូធ្មប់» ។

ពួកមន្ត្រីខាងសាសនា ក៏ចូលរួមទប់ស្កាត់ការសម្លាប់គ្នាក្រោមលេស «ធ្មប់» ដែរ ដោយបង្កើតក្រុមស្ម័គ្រចិត្តដែលមានភារកិច្ចទប់ស្កាត់ «ការចោទប្រកាន់ពីធ្មប់អាប» នៅតាមកន្លែងមានពិធីបុណ្យសព និងផ្តល់ដំណឹងទៅអាជ្ញាធរឱ្យបានរហ័សពេលកត់សម្គាល់ឃើញ «រឿងតាមចាប់គ្រូធ្មប់ជិតកើតមាន» ៕

សូមធ្វើការ Subcribe channel យើងផង